الفقر قواد الضنى

"الفقر قواد الضنى"

........................

دم الاصيل

مسفوك على هدم السما..

عنف الصهيل

والريح بتتسكع على ارصفة المسا..

الليل طويل

سترة وفضايح معلنا..

مواعيد الدوام

والحال يدوم على الدوام

اهانة وشتيمة ومرمطا..

الجوع بيحرق في الحشه

ورزق المساكين في البهدلا..

رطل اللحم بي كم

ساعة ايجار بي كم

عشم البكارة الضحل

والعفة المبجلة بالدجل

دم البرائه القاطر

من الرحم الجريح

لطخ مساحات الشرف الهزيل

كم من ضمير

باعوه نص ليل

وكم من إشترى..

الفقر قواد الضنى..

ورزق تجبير الاسى..

رطل اللحم بي كم

ساعة ايجار بي كم

ياواقفة في عرض الطريق

عرضك

ام طفلك الجيعان من كان رضيع

سمعة بلدك

ام كيس رغيف

ولو كان هزيل

 والليل طويل

سترة وفضايح معلنا..

منو الحجب حبة النسمة

البي فوقك تهب واداك

مراوح من هجير..

منو الشال ضفيرتك

ولبسك شوك الشجر..

بسم الشريعة الناجزة

منو الكب فوق جرحك

ملح الكلام المر..

يا فقرانه..

الدنيا فقريه

واحزانك نقريه

وبلدك متقريفة

بي قرفة سكات الناس

والفقر قواد الضنى

.......................................................

حسن سعيد الباشا